Մատչելիության հղումներ

Հազարավոր փախստականներ են ամեն օր մուտք գործում եվրոպական երկրներ


Երկրորդ աշխարհամարտից ի վեր Եվրոպայում փախստականների ամենամեծ ճգնաժամը շարունակում է խորանալ։

Տնտեսապես ոչ այնքան բարենպաստ պայմաններում գտնվող Բալկանյան երկրներն այսօր կանգնել են դժվարին կացության առջև. նրանցից յուրաքանչյուրը փորձում է փախստականների հոսքն ուղղել հարևան երկիր։ Օրինակ՝ Մակեդոնիան նրանց տրամադրում է իր սահմանի միջով դեպի Սերբիա մեկնելու դյուրին միջոցներ։

Ինչպես Ավստրիայի արտաքին գործերի նախարար Սեբաստիան Կուրցինն է ասել, Եվրոպայի ներգաղթի համակարգը անկատար է։ Նրա խոսքով, համակարգը չպետք է թույլ տա, որ որևէ երկիր առանց տվյալ անձին գրանցելու, նրան ուղղորդի այլ երկիր։

Հունգարիայից ստացված հաղորդագրությունների համաձայն, միայն անցած երկուշաբթի օրը Սերբիայից Հունգարիա է ժամանել 2100 փախստական։ Եվ ահա Հունգարիան փորձում է արագ ավարտին հասցնել սահմանի երկայնքով պատի կառուցման աշխատանքները։

«Եթե նրանց Հունգարիայում էլ արգելափակեն, դժվար է ասել, թե ուր այս մարդիկ կգնան», - ասել է «Միջազգային համաներում» իրավապաշտպան կազմակերպության ներկայացուցիչ Գաուրի Վան Գուլիկը։

Գաղթականներից շատերը փորձում են հասնել Գերմանիա։ Գերմանիայի կանցլեր Անգելա Մերկելը, որը մասնակցելու է Վիեննայում հինգշաբթի օրն անցկացվելիք հանդիպմանը, եվրոպական երկրներին կոչ է անում՝ ուժի մեջ մտցնել փախստականության մասին համատեղ համաձայնագիր։ «Խոսքը նախ և առաջ փախստականներին տեղում գրանցելու, նրանց կացարաններ տրամադրելու ու բժշկական նվազագույն օգնություն ցուցաբերելու մասին է», - ասել է նա։

Բեռլինը հայտարարում է, որ Սիրիայից գաղթած անձանց այլևս չի պարտադրելու վերադառնալ այն երկիր, որտեղ առաջինն է մուտք գործել։ Այս հայտարարությունը զայրացնում է մեծաթիվ գերմանացիների, ովքեր այս օրերին սկսել են փախստականության ներհոսքը դադարեցնելու կոչերով ցույցեր։ Նրանք երկուշաբթի օրը Բեռլինի արվարձաններից մեկում այրեցին փախստականների մի կացարան, որտեղ հարյուրավոր մարդիկ էին ապրում։

Ուղիղ հեռարձակում

XS
SM
MD
LG