Վարչապետի ասածներին կառավարության որևէ անդամ չի կարող հակադրվել, վարչապետ Հովիկ Աբրահամյանն այսօր այսպես արձագանքեց «Ազատության» հարցին, թե երկրի տնտեսական վիճակի վերաբերյալ իր և ֆինանսների նախարարի վերջին օրերի հայտարարությունների միջև արդյոք հակասությո՞ւն չկա:
Երկուշաբթի կառավարության նիստում Հովիկ Աբրահամյանը հայտարարեց, որ առաջին կիսամյակում երկրի տնտեսությունը աճել է 4.4 տոկոսով:
Ֆինանսների նախարար Գագիկ Խաչատրյանը, ով երկուշաբթի ներկա էր կառավարության այդ նիստին, հենց հաջորդ օրը ԱԺ ֆինանսավարկային և բյուջետային հարցերի մշտական հանձնաժողովի նիստում, ըստ «168 ժամ»-ի, հայտարարեց, որ տնտեսության գրեթե բոլոր ճյուղերում ծավալների անկում ունենք:
«Բյուջեի կատարողականի տեսանկյունից և առկա իրողություններից պոզիտիվ սիգնալներ մեզ չեն գալիս: Անկախ վիճակագրական տվյալներից, տնտեսության ճյուղերի զարգացումները մտահոգիչ են: Գրեթե բոլոր ճյուղերում ծավալների անկում ունենք: Անորոշությունները շատ-շատ են, չգիտենք՝ ո՞ր ուղղությամբ կզարգանա տնտեսությունը: Կառավարությունում հարց ենք բարձրացրել, թե ի՞նչ ուղղությամբ պետք է գնանք՝ խնայողությո՞ւն, պահանջակի ավելացո՞ւմ… ամեն օր քննարկումներ են կատարվում»,- ասել էր Խաչատրյանը:
Մի կողմից վարչապետը խոսում է տնտեսական աճի մասին, իսկ մյուս կողմից նույն կառավարությունում տնտեսական ոլորտի պատասխանատուներից մեկը հայտարարում է, թե տնտեսության գրեթե բոլոր ճյուղերում անկում է: Արդյո՞ք այստեղ հակասություն չկա, փորձեցինք պարզել վարչապետից:
«Ոչ մի հակասություն չկա, վարչապետի ասածին կառավարության որևէ անդամ չի կարա հակադրվի»,- ասաց Աբրահամյանը։
