Մատչելիության հղումներ

Հայ-ամերիկյան համագործակցությունից ծնունդ առած մշակութային ծրագրերը կներկայացվեն մարզերում


ԱՄՆ դեսպանատան հասարակայնության հետ կապերի բաժնի ղեկավար Ժակլին Դիլի
ԱՄՆ դեսպանատան հասարակայնության հետ կապերի բաժնի ղեկավար Ժակլին Դիլի

Հիմնադրման օրից Հայաստանում Միացյալ Նահանգների դեսպանատունը մի շարք ուշագրավ ծրագրեր է իրականացրել, և ահա՝ այս աշնան սկզբից էլ ԱՄՆ դեսպանատունը մի նոր ուշագրավ ծրագիր է ներկայացնում «Ամերիկյան մշակութային շրջագայություն 2015» խորագրի ներքո:

Ինչպես այսօր մեր ռադիոկայանին տված հարցազրույցում շեշտում էր Հայաստանում ԱՄՆ դեսպանատան հասարակայնության հետ կապերի բաժնի ղեկավար Ժակլին Դիլին, ծրագիրը համագործակցության արդյունք է և իր մեջ ներառում է սեպտեմբեր - հոկտեմբեր ամիսներին Երևանում և մարզերում ներկայացվող համերգային ծրագրեր, ներառական պարային բեմադրություններ, դեսպանատան աջակցությամբ նկարահանված վավերագրական ֆիլմերի ցուցադրություն:

Դիլի․ - Սեպտեմբերին և հոկտեմբերին մենք իրականացնում ենք մեր ամերիկյան մշակութային շրջագայությունը, և նպատակը այն է, որ Հայաստանում տարբեր քաղաքներում բնակվող հանդիսատեսը առիթ ունենա վայելելու երեք շատ հաջողված մշակութային ծրագրերը, որոնք արդեն եղել են, բայց հիմնականում Երևանում: Եվ այդ ամենը հայկական կազմակերպությունների հետ մեր համագործակցության արդյունքն են:

«Ազատություն»․ - Մարզային շրջագայությունների վրա եք շատ ուշադրություն դարձրել: Հենց մարզային ուղղվածություն ունի, փաստորեն, ծրագիրը: Ու վերջինը, որքան գիտեմ, Գյումրիում՝ հոկտեմբերի 5-ին: Մի քանի խոսք, եթե կարելի է, այդ մասին:

Դիլի․ - Իհարկե, որովհետև մենք ուզում ենք հայ-ամերիկյան մշակութային համագործակցությունը ներկայացնել նաև Երևանից դուրս և ուզում ենք ամբողջ Հայաստանում բնակվող հանդիսատեսի հետ շփվել: Եվ այս երեք շատ հաջողված ծրագրերը՝ առաջինը «Հոլիվուդ նոն ստոպ» համերգն է:

«Ազատություն»․ - Այո, Սերգեյ Սմբատյանի ղեկավարությամբ՝ Հայաստանի երիտասարդական սիմֆոնիկ նվագախումբ:

Դիլի․ - Ճիշտ է, և մենք շատ ուրախ ենք, շատ հպարտ ենք համագործակցել Հայաստանի պետական երիտասարդական նվագախմբի հետ: Եվ սեպտեմբերի սկզբից նվագախումբը հանդես է եկել երեք անգամ Գորիսում, Կապանում և Մեղրիում և հանդես կգա ևս մեկ անգամ՝ Գյումրիում, հոկտեմբերի 5-ին, Գյումրու դրամատիկական թատրոնում, ժամը 6-ին:

«Ազատություն»․ - Դուք նաև այդ ծրագրի մեջ մի բեմադրություն եք ներառել՝ «Աղջիկը լուսնի վրա», որը ներառական բեմադրություն, այնպես չէ՞: Մի քանի խոսք այդ մասին, եթե կարելի է:

Դիլի․ - Իհարկե: «Աղջիկը լուսնի վրա» բեմադրությունը շատ հաջողված բեմադրություն է: Այն ստեղծել է հայ բեմադրիչ և պարուսույց Արինա Արարատյանը՝ ԱՄՆ դեսպանատան աջակցությամբ: Այս բեմադրությունը միավորում է պրոֆեսիոնալ պարողներին և հաշմանդամություն ունեցող, սկսնակ պարողներին:

«Ազատություն»․ - Տիկին Դիլի, այս «Ամերիկյան մշակութային շրջագայություն 2015» ծրագրի մի ուշագրավ մասն է նաև ԹՈՒՄՈ ստեղծարար կենտրոնում երիտասարդ ռեժիսորների հետ համագործակցությունը և ֆիլմերի պատրաստումը: Այդ մասին ի՞նչ կարող եք ասել:

Դիլի․ - Իհարկե: Անցյալ տարի համագործակցել ենք ԹՈՒՄՈ կենտրոնի հետ այդ ծրագիրը իրականացնելու համար և այդ ծրագիրը 17-ից 16 վավերագրողներին հնարավորություն տվեց պատրաստել կարճամետրաժ, որոնք արծարծում են որոշ թեմաներ՝ սոցիալական, տնտեսական, քաղաքական, և այս տարի մենք տանում ենք այս ֆիլմերը 10 տարբեր քաղաքներ:

«Ազատություն»․ - Եթե կարելի է, մի քանի խոսքով ներկայացրեք՝ հաջորդիվ ի՞նչ է սպասվում, ի՞նչ կարող ենք ակնկալել, ինչ ծրագրեր կան առաջիկայում մշակութային առումով:

Դիլի․ - Ամեն տարի մենք իրականացնում ենք շատ տարբեր մշակութային ծրագրեր և նախընտրում ենք համագործակցել հայկական կազմակերպությունների հետ, որովհետև Հայաստանը շատ երկար, շատ հարուստ մշակութային ժառանգություն ունի և մենք կարծում ենք, որ երբ մենք համագործակցում ենք, մենք կարող ենք ստեղծել շատ լավ համակցություններ:

Ուղիղ հեռարձակում

XS
SM
MD
LG