Հատուկ քննչական ծառայությունն առայժմ չի հաղորդում՝ արդյո՞ք ձերբակալվել է ընտրական հանձնաժողովի այն անդամը, ով, ընդդիմության պնդմամբ, փորձել է կաշառել Հայ ազգային կոնգրեսի (ՀԱԿ) ներկայացուցչին:
Գլխավոր դատախազությունը ձերբակալելու ցուցումը դեռ երեք օր առաջ էր տվել։ Դատախազությունը քրեական գործը հարուցել էր ՀԱԿ խորհրդարանական խմբակցության ղեկավար Լևոն Զուրաբյանի ներկայացրած տեսագրության հիման վրա:
Գլխավոր դատախազ Գևորգ Կոստանյանի հետ շուրջ երկժամյա դռնփակ հանդիպումից հետո Զուրաբյանը երեկ ասաց, թե հնարավոր է, որ նոր հաղորդումներ ներկայացնեն իրավապահներին․ - «Ունենք ուղղակի տեղատարափ ահազանգերի: Խնդիրն այն է, որ մենք պետք է ամեն գործի բացահայտման հիմնավորվածությունը պարզենք, նոր դիմենք այս քայլին»:
Իսկ դատախազության արձագանքը Զուրաբյանը պատշաճ, բայց ոչ բավարար է գնահատում։ Նա փոխանցեց, որ հանդիպման ժամանակ պնդել է, որ պատասխանատվության պետք է ենթարկվի ոչ միայն կատարողը, այլև պատվիրատուն․ - «Ուղղակի բացառում եմ այն տարբերակը, որ, ասենք, հանձնաժողովի նախագահը կարող էր կաշառք տալ Սահմանադրությունը անցկացնելու նպատակով՝ ունենալով զուտ անձնական շահագրգռություն: Այդքան սիրահարվե՞լ է Սահմանադրության նոր նախագծին․․․ Բացառվում է։ Բոլորս էլ շատ լավ հասկանում ենք, որ կարող է լինել մեկ դրդապատճառ՝ դա վերևից տրված հրահանգ է, իշխանության հրահանգն է»։
Ընտրողներին կաշառք բաժանելու վերաբերյալ «Ոչ»-ի ճակատն առայժմ ստույգ տեղեկություններ չունի: Զուրաբյանի տպավորությամբ, իշխանությունն այս անգամ շեշտը դրել է հանձնաժողովի անդամներին ճնշելու կամ կաշառելու վրա։ Կեղծարարություններն արձանագրելու նպատակով, ՀԱԿ-ի ներկայացուցիչները պատրաստվում են հսկել գաղտնի տեսաձայնագրող սարքերով:
«Հասկանալի է արդեն, թե որ ուղղությամբ պետք է գործել, որ ընտրակեղծարարների ձեռքը բռնենք՝ գաղտնի նկարահանումներ, ձայնագրություններ, որը թույլ կտա այդ ապօրինությունների մասին փաստերը անհերքելի ձևով ներկայացնել դատախազությանը», - նշեց ընդդիմադիր գործիչը:
ՀՀԿ-ում անհեթհեթ են որակում ընդդիմադիրների պնդումները։ Իշխող կուսակցության խորհրդարանական խմբակցության ղեկավար Վահրամ Բաղդասարյանը վստահեցնում է , թե հանձնաժողովի անդամներին կաշառելու մեջ իրենք «շահ չունեն»․ - «Իշխանությունը նման թեմաներով չի զբաղվում, իշխանությունը կանխարգելիչ գործողություններ է ծավալում»:
