Իրանի նախագահն այսօր պաշտոնական այցով բացել է նոր ճանապարհ եվրոպական երկրների հետ տնտեսական հարաբերությունները վերականգնելու համար: Անցած 16 տարիներին միջուկային վիճահարույց ծրագրի պատճառով եվրոպական երկրների հետ հարաբերությունների հնարավորությունից զրկված Իրանի ղեկավարն այսօր 120 հոգանոց պատվիրակությունով ժամանել է Իտալիա:
Հունվարի 16-ին Միացյալ Նահանգների պետքարտուղար Ջոն Քերրին և Եվրամիության արտաքին քաղաքականության և անվտանգության հարցերով գերագույն հանձնակատար Ֆեդերիկա Մոգերինին հայտարարել էին Իրանի դեմ սահմանված պատժամիջոցների չեղարկման մասին:
Հասան Ռոհանիին Հռոմում նախագահի նստավայրում ընդունել է պաշտոնակիցը՝ Սերջիո Մատարելլան: Reuters-ի փոխանցմամբ, Իրանի և Իտալիայի նախագահները ստորագրել են ավելի քան 18 միլիարդ ամերիկյան դոլարի համաձայնագրեր՝ էներգետիկ և արդյունաբերության ոլորտում համագործակցության վերաբերյալ:
Վաղը նախատեսված է Իրանի նախագահի հանդիպումը Իտալիայի վարչապետ Մատեո Ռենցիի հետ: Միջազգային լրատվական գործակալությունների հաղորդմամբ, հունվարի 26-ին Հասան Ռոհանիին պետք է ընդունի Հռոմի պապ Ֆրանցիսկոսը:
Իրանի միջուկային ծրագրի շուրջ կնքված համաձայնությունից հետո Հռոմի պապը հայտարարել էր, որ հույս ունի՝ դա կդառնա «հաստատուն քայլ դեպի ավելի ապահով և եղբայրական աշխարհ»:
Նախատեսված է, որ Իտալիայում հանդիպումներից հետո Իրանի նախագահը կմեկնի Ֆրանսիա: Ակնկալվում է, որ Ֆրանսիայում նույնպես իրանական կառավարությունը կստորագրի համաձայնագրեր, այդ թվում՝ ֆրանսիական Airbus ընկերությունից 114 ինքնաթիռներ գնելու վերաբերյալ:
Նախքան Իտալիա այցը, Ռոհանին Թեհրանում երկու օր առաջ ընդունել էր Չինաստանի նախագահ Սի Ծինփինին: Իրանի նախագահը հայտարարել էր, որ Չինաստանի ղեկավարի հետ որոշել են զարգացնել երկկողմ հարաբերությունները և առաջիկա 10 տարիներին առևտրաշրջանառությունը հասցնել 600 միլիարդ դոլարի: