Մատչելիության հղումներ

Բաքուն բողոքի նամակներ է հղել ՄԽ համանախագահ երկրներին


Ադրբեջանի ԱԳ նախարար Էլմար Մամեդյարով, արխիվ
Ադրբեջանի ԱԳ նախարար Էլմար Մամեդյարով, արխիվ

Մամեդյարովը ծիծաղահարույց է որակում ԵԽԽՎ-ին ղարաբաղյան կարգավորման միջնորդների դիմումը:

«Մենք դժգոհ ենք Մինսկի խմբի համանախագահների աշխատանքից», - երեքշաբթի երեկոյան հայտարարել է Ադրբեջանի արտգործնախարար Էլմար Մամեդյարովը:

Նրա խոսքով՝ համանախագահները այս տարիներին այդպես էլ չկարողացան որևէ տեղաշարժի հասնել Լեռնային Ղարաբաղի հակամարտության կարգավորման գործում:

«Ադրբեջանի տարածքային ամբողջականությունը պետք է վերականգնվի: Պահանջում ենք, որպեսզի Մինսկի խումբը իր գործունեությունը կառուցի հենց այդ ուղղությամբ: Ադրբեջանական հողերը օկուպացված են: ՄԱԿ-ի Անվտանգության խորհրդի երեք մշտական անդամներ ղեկավարում են Մինսկի խումբը, բայց, չնայած դրան, ոչ մի տեղաշարժ չի եղել», - APA լրատվական գործակալության փոխանցմամբ՝ հայտարարել է Մամեդյարովը:

«Համանախագահների նամակը Ստրասբուրգ միայն ծիծաղ է հարուցում: Ես բողոքով նամակներ եմ ուղարկել համանախագահ երկրների արտգործնախարարություններ, որոնցում նշել եմ, որ Լեռնային Ղարաբաղի հետ կապված ցանկացած հարցի հրատապություն հաղորդելը մեր անձնական գործն է: Ոչ ոք չի կարող խառնվել դրան: Նրանք չեն կարող ճնշում գործադրել եվրոպացի խորհրդարանականների վրա: Դա անտրամաբանական է», - ասել է Ադրբեջանի արտգործնախարարը՝ անդրադառնալով Եվրոպայի խորհրդի Խորհրդարանական վեհաժողովում (ԵԽԽՎ) հակահայկական երկու բանաձևերի նախագծերի քննարկման նախաշեմին ԵԱՀԿ-ի Մինսկի խմբի համանախագահների հրապարակած հայտարարությանը:

Հունվարի 22-ի հայտարարությունում, հիշեցնենք, ղարաբաղյան կարգավորման միջնորդները ԵԽԽՎ-ին կոչ էին անում չանել քայլեր, որոնք կարող են վնասել Լեռնային Ղարաբաղի խաղաղ կարգավորման բանակցությունները։

Մամեդյարովը երեկ նշել է նաև, թե որևէ նորություն չկա համանախագահների հետ հնարավոր հանդիպումների վերաբերյալ: «Այն բանից հետո, որ նրանք նամակ ուղարկեցին Ստրասբուրգ, չեմ կարծում, թե հանդիպում հնարավոր է», - հայտարարել է Ադրբեջանի արտաքին քաղաքական գերատեսչության ղեկավարը:

Ուղիղ հեռարձակում

XS
SM
MD
LG