Ռուսաստանի նախագահ Վլադիմիր Պուտինի կողմից ղարաբաղյան բանակցությունների հերթական փուլ նախաձեռնելու տեղեկությունների ֆոնին արտգործնախարար Սերգեյ Լավրովի՝ այս շաբաթ նախատեսված երևանյան այցը, ըստ քաղաքագետ Ստեփան Սաֆարյանի, հետախուզական նշանակություն ունի:
Նա չի բացառում, որ Ռուսաստանը փորձում է ճնշում գործադրել հայկական կողմի վրա՝ ղարաբաղյան հարցն իր տարբերակով լուծելու համար:
«Այդ պլանը մեկին մեկ նույնությամբ կրկնում է այն, ինչը մենք տեսել ենք 2008 թվականին, երբ հայտարարվեց կրկին տարածքների մի մասի վերադարձի մասին, փախստականների վերադարձի մասին, ռուս խաղաղապահների տեղակայման մասին և այդպես շարունակ», - «Ազատության» հետ զրույցում ասաց Սաֆարյանը:
Ըստ նրա՝ «այժմ ակնհայտորեն խաղը շարունակվում է, և Ռուսաստանը հերթական փորձն է անում ոչ միայն բանակցային գործընթացը իր ձեռքը վերցնել, ինչպես 2008 թվականին մայնդորֆյան հանդիպումից հետո, այլ նաև լուծել Ադրբեջանին, այսպես ասած, զավթելու հեռահար նպատակը, և որի դիմաց ինքը պետք է որոշակի զիջումներ պարտադրի հայկական կողմին»:
«Հետևաբար, Լավրովի այս այցը ավելի շատ հետախուզական այց է, և առաջին հերթին կփորձեն հասկանալ՝ արդյոք Հայաստանը պատրաստվում է Ռուսաստանի նախագահի հովանու ներքո այդ երկարատև բանակցություններին և արդյոք սկզբունքորեն համաձայնում է պուտինյան պլանին, որից հետո ակնհայտորեն նրանք մնացածը կհամաձայնեցնեն Ադրբեջանի հետ», - ասաց Սաֆարյանը:
Քաղաքագետ Սերգեյ Մինասյանը, մինչդեռ, Ռուսաստանի կողմից Հայաստանի վրա ճնշումների բանեցման հեռանկար չի տեսնում:
«Լավրովի այցի գլխավոր նպատակը՝ փորձել պարզել՝ արդյոք հնարավորություն կա հակամարտող կողմերին ստիպել գնալ ինչ-որ մի փաստաթղթի կամ մի պայմանավորվածության ստորագրմանը, որը կֆիքսի հրադադարի ռեժիմի շարունակությունը և կայունությունը», - «Ազատության» հետ զրույցում ասաց Մինասյանը՝ հավելելով, թե չի կարծում, որ «դրանից ավել այս պահին ինչ-որ փաստաթղթի մասին խոսք կարող է գնալ»:
Նա, սակայն, կայուն հրադադարի հաստատման հնարավորություն չի տեսնում:
Սերգեյ Լավրովը, հիշեցնենք, երկօրյա այցով Հայաստան է ժամանելու վաղը՝ արտգործնախարար Էդվարդ Նալբանդյանի հրավերով:
