Մատչելիության հղումներ

Կրեմլի խոսնակ. «Երևանը Մոսկվայի հետ չի քննարկել ԼՂ ճանաչման մասին օրինագիծը»


Կրեմլի խոսնակ Դմիտրի Պեսկով, արխիվ
Կրեմլի խոսնակ Դմիտրի Պեսկով, արխիվ

Ռուսաստանի ԱԳ նախարարն էլ «խուճապի» պատճառներ չի տեսնում:

«Լեռնային Ղարաբաղի ճանաչման մասին օրինագիծը պաշտոնական Երևանը Մոսկվայի հետ չի քննարկել», - այսօր ռուսաստանցի լրագրողների հետ զրույցում հայտարարել է Վլադիմիր Պուտինի խոսնակ Դմիտրի Պեսկովը` նշելով, թե Կրեմլում շարունակում են ուշադրությամբ հետևել ղարաբաղյան հակամարտության գոտում տիրող իրադրությանը:

«Մենք ուշադիր կերպով հետևում ենք այն բոլոր որոշումներին, որոնք կայացվում են այս համատեքստում: Կասկած չկա, որ մենք շարունակում ենք ակնկալել, որ հակամարտության կողմերը կխուսափեն քայլերից, որոնք կարող են խախտել բավական փխրուն հրադադարը` հանգեցնելով Ղարաբաղի գոտում ընդհանուր իրավիճակի սրացման», - ասել է Ռուսաստանի նախագահի խոսնակը:

Դեռ մինչև Լեռնային Ղարաբաղի ճանաչման օրինագծի վերաբերյալ Հայաստանի կառավարության որոշումը այս խնդրին անդրադարձել էր Ռուսաստանի արտաքին գործերի նախարար Սերգեյ Լավրովը: Այս մասին Ռուսաստանի արտաքին քաղաքական գերատեսչության ղեկավարն ասել է «Ռուսաստանն այսօր» միջազգային գործակալությանը տված հարցազույցում, որը դիվանագիտական գերատեսչության կայքում տեղադրվեց երեկ երեկոյան:

«Ինչ վերաբերում է Լեռնային Ղարաբաղի ճանաչման թեմային. դա ոչ թե Հայաստանն է քննարկում, այլ խորհրդարանի երկու պատգամավորների առաջարկն է: Հայաստանի կառավարությունը, ինչպես իրենք են բացատրում` հանդարտեցնելով կրքերը, պետք է պարզապես հետևի օրենքի պահանջին և այդ օրինագծի վերաբերյալ եզրակացություն նախապատրաստի: Այնպես որ, ես այժմ չէի անհանգստանա և խուճապի չէի մատնվի», - նշել է Լավրովը:

Ռուսաստանի արտաքին գործերի նախարարի խոսքով՝ հայկական կողմից հավաստիացումներ են հնչել, որ Երևանը հավատարիմ է խաղաղ կարգավորման գործընթացին:

«Երբ ես Երևանում էի, շփվում էի իմ գործընկեր Էդվարդ Նալբանդյանի հետ, հետո՝ նրա հետ կայացած հեռախոսազրույցի ընթացքում, և հետո, երբ նա էր Մոսկվա ժամանել արդեն ապրիլի սկզբին տեղի ունեցած իրադարձություններից հետո, ինձ մշտապես հավատացրել են, որ Երևանը հավատարիմ է հարցի խաղաղ կարգավորման գաղափարին: Դա նշանակում է, որ Ղարաբաղի կարգավիճակը որոշվելու է ընդհանուր համաձայնության համատեքստում, այլ ոչ թե միակողմանիորեն», - ասում էր Ռուսաստանի արտաքին քաղաքական գերատեսչության ղեկավարը:

Պաշտոնական Բաքուն արդեն իսկ իր գոհունակությունն է հայտնել Սերգեյ Լավրովի այս հայտարարության առթիվ: Արտաքին գործերի նախարարության խոսնակ Հիքմեթ Հաջիևի խոսքով` «Ադրբեջան ողջունում և կիսում է Լավրովի տեսակետն այս հարցում»:

Երեկ հեռարձակված այս հարցազրույցում Սերգեյ Լավրովն անդրադարձավ նաև շփման գծի երկայնքով իրադրության կայունացմանն ուղղված քայլերի անհրաժեշտությանը` նշելով, որ այս հարցում բավական ակտիվ է պաշտոնական Բեռլինը:

«ԵԱՀԿ-ի գերմանական նախագահությունը ցանկանում է ակտիվություն ցուցաբերել, և մենք խրախուսում ենք այդ ցանկությունը: Ժամանակին Հայաստանի և Ադրբեջանի նախագահները հավանություն տվեցին ԵԱՀԿ-ի [նախաձեռնած] աշխատանքներին, որոնց նպատակն է միջադեպերի հետաքննության մեխանիզմի ստեղծումն ու վստահության ամրապնդմանն ուղղված քայլերի մշակումը: Կարծում են, որ այս թեման այսօր ավելի քան հրատապ է: Կենտրոնանալու ենք հենց այդ խնդրի վրա: Իհարկե, չի կարելի մոռանալ նաև քաղաքական գործընթացի մասին: Կրքերը թերևս պետք է հանդարտվեն, դա պարզ է: Բայց և այնպես, քաղաքական պրոցեսն ու կարգավորումը այլընտրանք չունեն», - հայտարարում էր Ռուսաստանի արտաքին գործերի նախարարը:

Ուղիղ հեռարձակում

XS
SM
MD
LG