Մատչելիության հղումներ

Հայազգի գործարարները գնել են Մոսկվայի հանրահայտ «Արագվի» ռեստորանը


Մոսկվայի Կարմիր հրապարակը 1968 թվականին, արխիվային լուսանկար
Մոսկվայի Կարմիր հրապարակը 1968 թվականին, արխիվային լուսանկար

Նոր սեփականատերերը 20 միլիոն դոլար ծախսելով ցանկանում են վերականգնել լեգենդար ռեստորանի համբավը:

Մոսկվայում սովետական շրջանում ամենահայտնի ռեստորաններից մեկը՝ «Արագվի»-ն գնել են ռուսաստանաբնակ հայազգի գործարարները՝ «Տաշիր գրուպ»-ը և Գոռ Նահապետյանը, ով նախկինում «Տրոյկա Դիալոգ» ներդրումային խմբի առաջնորդն էր: Նրանք 20 միլիոն դոլար են ներդրել «Արագվի»-ն վերանորոգելու և վերաբացելու համար, ասելով, թե ցանկանում են վերակենդանացնել սովետական շրջանի լեգենդ ռեստորանը:

«Իհարկե մենք ցանկանում ենք վերակենդանացնել անցած դարաշրջանի նոստալգիան», - France-Presse-ին ասել է Գոռ Նահապետյանը:

Ռուսաստանի մայրաքաղաքի կենտրոնում Տվերսկիի վրա գտնվող «Արագվի»-ն ժամանակին Մոսկվայի ամենահայտնի ու լեգենդար վայրերից էր: Այստեղ են հաճախել ճանաչված դերասաններ, նկարիչներ, մարզիկներ, տիեզերագնացներ: Ըստ լեգենդի, այստեղ է մտահղացվել Խորհրդային Միության օրհներգի տեքստը՝ 1943-ին բանաստեղծ Սերգեյ Միխալկովը հենց «Արագվի»-ում է ոգեշնչվել ու գրել այն:

Բայց «Արագվի»-ն նաև չարագուշակ վայր էր: Այս ռեստորանը գաղտնի հանդիպումների համար օգտագործել են ԿԳԲ-ի գործակալները: Ավելին, ըստ լեգենդի, 1938-ին «Արագվի»-ն բացվել է Լավրենտի Բերիայի նախաձեռնությամբ:

Ստալինյան բռնաճնշումների այդ վատթարագույն տարում «Արագվի»-ում հանդիպումներ, խնջույքներ էին կազմակերպում НКВД-ի պաշտոնյաներն ու գործակալները, որը հետագայում վերանվանվեց КГБ: Ըստ լեգենդներից մեկի՝ խնջույքի համար այստեղ սենյակ էր պատվիրել և Բերիան, և այդ սրահը ևս սովետական շրջանի ոգով վերանորոգվել է:

Նախկին հետախույզ Միխայիլ Լյուբովը, ով երկար ժամանակ ղեկավարել է Բրիտանիայի և Սկանդինավյան երկրների դեմ լրտեսական գործողությունները, France-Presse-ին պատմել է, որ «Արագվի»-ի սեղաններում մոնտաժված էին միկրոֆոններ ու ձայնագրող սարքեր: Անձամբ ինքը երկու նոր աշխատակիցների հետ հանդիպել է «Արագվի»-ում: «Մի ուրիշ երեկոյի ժամանակ մեր գինովցած գործընկերներից մեկը պարի հրավիրեց մի գեղեցիկ աղջկա, չիմանալով, որ նա ամերիկացի լրտես է», - ծիծաղելով պատմել է նախկին հետախույզն ու նաև ասել, որ «Արագվի»-ի դռնապահները հիմնականում թոշակի անցած գործակալներ էին:

Բացվելուց հետո «Արագվի»-ն շատ արագ հայտնի ռեստորան դարձավ, իսկ 60-ականներին, Նիկիտա Խրուշչովի «հալոցքի ժամանակաշրջանում» «Արագվի»-ն դարձել էր բոհեմական խավի՝ դերասանների, նկարիչների սիրելի վայրերից մեկը:

Ինչ վերաբերում է խոհանոցին, ապա մոսկվացիների համար այն վրացական անկրկնելի համով ուտեստներ էին: Ստալինյան ժամանակաշրջանում դելիկատեսները, ընկույզով ու սխտորով պատրաստված հավը՝ սածիվին, հատուկ գնացքով բերում էին Թբիլիսիից: Գրող Լեոնիդ Պարֆյոնովը պատմել է, որ ծագումով վրացի Ստալինի համար վրացական մթերքները Կրեմլ էին բերում ու նրան մատակարարում որպես սովետական ցարի: «Նույնիսկ նրա մահից հետո, սովետական մռայլ խոհանոցում վրացական ավանդական ուտեստները, գինին ու համեմունքները կենսախնդության շունչ էին բերում, և «Արագվի»-ն սովետական շիկի սիմվոլն էր»,- ասել է Պարֆյոնովը:

Խորհրդային Միության փլուզումից՝ 1991-ից հետո «Արագվի»-ն մի քանի սեփականատեր փոխեց, վերավաճառվեց, բայց հին օրերի հմայքը չվերականգնվեց, ու 2003-ին ռեստորանը փակվեց:

Հիմա հայազգի նոր սեփականատերերը 20 միլիոն դոլար ծախսելով ցանկանում են վերականգնել ռեստորանի համբավը: Խոհանոցը հիմնականում վրացական է, ինչը նախկինում գերել է այցելուներին, գումարած այլ ճաշատեսակներ՝ սևծովյան ձկնեղեն, ռուսական բորշչ:

Վերանորոգված սրահները լրիվ համապատասխանում են սովետական դարաշրջանին՝ եգիպտացորենի փնջեր, տրակտորների ու կոլտնտեսականների առույգ, ժպտացող դեմքերով կտավներ, մասնավորապես՝ այն սենյակում, որը ժամանակին պատվիրել էր Բերիան:

Վերաբացված ռեստորանի այցելուների գիրքը լի է նոստալգիկ գրառումներով՝ «Վերադարձրե՛ք նախկին բաղադրատոմսերը»:

Ուղիղ հեռարձակում

XS
SM
MD
LG