Մատչելիության հղումներ

Մամեդյարովն այսօր կհանդիպի ԵԱՀԿ Մինսկի խմբի համանախագահներին


Ադրբեջանի արտգործնախարար Էլմար Մամեդյարով, արխիվ
Ադրբեջանի արտգործնախարար Էլմար Մամեդյարով, արխիվ

Հայաստանի արտգործնախարար Էդվարդ Նալբանդյանը ղարաբաղյան կարգավորման միջնորդների հետ կհանդիպի հունիսի 2-ին՝ Փարիզում։

Երեկ Բրյուսել է մեկնել Ադրբեջանի արտգործնախարար Էլմար Մամեդյարովը, ով նախ ՆԱՏՕ-ի կենտրոնակայանում մասնակցելու է Ադրբեջան-ՆԱՏՕ նիստին, ապա հանդիպելու է ԵԱՀԿ-ի Մինսկի խմբի համանախագահներին։

Իսկ հունիսի 2-ին Փարիզում համանախագահները հանդիպելու են Հայաստանի արտգործնախարար Էդվարդ Նալբանդյանին։

Անցած հինգշաբթի օրը՝ մայիսի 26-ին Նալբանդյանը հայտարարել է, որ միջնորդների հետ հանդիպման ընթացքում որևէ փաստաթուղթ չի ստորագրվելու։ «Այնպիսի մշակված փաստաթուղթ չկա, որը կարող է ստորագրվել», - ասել է արտգործնախարարը։

Հիշեցնենք, որ համանախագահող երեք երկրների արտաքին գերատեսչությունների ղեկավարների նախաձեռնությամբ և մասնակցությամբ Վիեննայում մայիսի 16-ին կայացել է Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հանդիպումը, որն առաջինն էր ապրիլյան ռազմական աննախադեպ ծանր մարտերից հետո։

Ռուսաստանի արտգործնախարար Սերգեյ Լավրովի, Ամերիկայի Միացյալ Նահանգների պետքարտուղար Ջոն Քերրիի և Ֆրանսիայի եվրոպական հարցերով պետքարտուղար Արլեմ Դեզիրի միջնորդությամբ անցկացված բանակցությունների արդյունքում Սարգսյանը և Ալիևը վերահաստատել են իրենց հանձնառությունը հրադադարի պահպանմանը և հակամարտության խաղաղ կարգավորմանը։

Բացի այդ, Վիեննայում որոշվել է լրացուցիչ լծակներ տրամադրել շփման գծում դիտարկումներ իրականացնող ԵԱՀԿ-ի առաքելությանը։

Վիեննայի բանակցություններից հետո միջնորդները հայտնել են, որ հունիսին հնարավոր է նախագահների մակարդակով մի նոր հանդիպում։

Երեկ պաշտոնական Բաքուն տարածել է ուշագրավ մեկ այլ հաղորդագրություն՝ Ադրբեջանի պաշտպանության նախարար, գեներալ-գնդապետ Զաքիր Հասանովը մեկնել է Թուրքիա, որտեղ ներկա կլինի Իզմիրում ընթացող «Էֆես-2016» զորավարժությունների ավարտական փուլին։

Այդ զորավարժություններին մասնակցում են 9 երկրների զինված ուժերի ստորաբաժանումներ, այդ թվում՝ ադրբեջանցի 30 զինծառայող։

Ուղիղ հեռարձակում

XS
SM
MD
LG