Մատչելիության հղումներ

Բողոքի ակցիա՝ Ռուսաստանի հետ միասնական ՀՕՊ համակարգի ստեղծման դեմ


«Չենք հանձնելու ո՛չ օդը, ո՛չ հողը» կարգախոսով վաղ առավոտից խորհրդարանի առջև էին հավաքվել տասնյակ ցուցարարներ՝ պատգամավորներից պահանջելու չվավերացնել Ռուսաստանի հետ կնքված հակաօդային պաշտպանության միացյալ համակարգի պայմանագիրը:

«Թեպետ համաձայնագիրը կոչվում է միավորված համակարգ ստեղծելու մասին, բայց իրականում Հայաստանի տարածքը, որպես առանձին շրջան, ներառված է Ռուսաստանի Հարավկովկասյան զինվորական օկրուգի պատասխանատվության տարածքում», - ասում է ընդդիմադիր «Նոր Հայաստան»-ի անդամ Վարուժան Ավետիսյանը, ով մի քանի տարի աշխատել է Պաշտպանության նախարարությունում և գիտի օդային պաշտպանության առանձնահատկությունները․ - «Այսինքն՝ այս համաձայնագրով մենք դառնում ենք ուրիշ պետության զինված ուժերի ենթակայությամբ գործող ենթա-ենթա-բաղադրիչ: Սա մեր զինված ուժերի կառավարման և մեր ինքնիշխանության նկատմամբ ուղիղ ոտնձգություն է»:

Ընդդիմադիր գործչի համոզմամբ, կախվածությունը Մոսկվայից այնքան մեծ է, որ համագործակցության մասին խոսք լինել չի կարող․ - «Հայաստանի քաղաքական ղեկավարությունը ուղղակի խամաճիկ է և բացարձակապես չի համարձակվելու որևէ ինքնուրույն քայլ կատարելու՝ թեկուզ երևույթը վերաբերի ազգային անվտանգության կենսական շահերին»:

Կինոռեժիսոր Տիգրան Խզմալյանն անգամ ավելորդ է համարում խոսել ինքնիշխանության մասին, ասում է՝ Հայաստանը դարձել է «գուբեռնիա», և սա «չափազանցություն չէ»: - «Մենք ստացանք ամենաթանկ գազ, ամենաթանկ հոսանք, ամենաթանկ վարկեր և մենք ստացանք պատերազմ: Մենք զիջել ենք ամեն ինչ, ինչ հնարավոր էր: Սա խորհրդանշական վերջին կաթիլներից մեկն է: Սա նշանակում է, որ մենք մեր տունը, մեր ունեցվածքը և մեր երեխաների ապագան ոչ թե զիջում ենք, այլ լուռ նայում ենք, թե ինչպես է վաճառվում»:

«Ազգային ինքնորոշում միավորման» առաջնորդ Պարույր Հայրիկյանը տարակուսած էր՝ գոնե ապրիլյան իրադարձություններից հետևություն անեին, որ Ռուսաստանը վստահելի դաշնակից չէ․ - «Եթե այդ ամենից հետո դու շարունակում ես Ռուսաստանի հետ ոչ միայն հարաբերություններ պահպանել, այլ նրա բարյացակամությանն ես հավատում, նշանակում է՝ քո բոլոր խնդիրները քո խնդիրներն են: Որովհետև եթե դու ապուշ ես՝ վերջ, ոչ մեկից ոչինչ կախված չէ, քո ապուշության հետևանքները պիտի դու վայելես»:

Տեղեկանալով, որ հարցն ընդգրկված չէ նիստի օրակարգում, ցուցարարները հեռացան:

Ուղիղ հեռարձակում

XS
SM
MD
LG