Մատչելիության հղումներ

Հակակոռուպցիոն օրինագծերի փաթեթն արդեն աշնանը կներկայացվի ԱԺ


Կոռուպցիայի դեմ պայքարի խորհրդի հերթական նիստը, արխիվ
Կոռուպցիայի դեմ պայքարի խորհրդի հերթական նիստը, արխիվ

Խորհրդի անդամները հույս ունեն, որ մշակվող փաթեթով էապես կհամալրվի կոռուպացիայի դեմ պայքարի գործիքակազմը:

«Ապօրինի հարստացումը քրեականացնելը մի շարք զարգացած երկրներում կոռուպցիայի դեմ պայքարում հաջողության հասնելու երաշխիքներից մեկն է»: Այս մասին երեկ վարչապետի գլխավորած՝ Կոռուպցիայի դեմ պայքարի խորհրդի հերթական նիստում հայտարարել է «Իրավաբանների հայկական ասոցիացիա» ՀԿ-ի նախագահ Կարեն Զադոյանը՝ հղում անելով միջազգային փորձին ու սեփական ուսումնասիրությունների արդյունքներին:

Զադոյանը 7 տարի շարունակ այս մասին բարձրաձայնել է, բայց, ըստ նրա, իր մտահոգություններին միայն հիմա են արձագանքում: Երեկվա նիստի ժամանակ վարչապետ Հովիկ Աբրահամյանը հանձնարարական է տվել երկամսյա ժամկետում օրենսդրական փաթեթ մշակել՝ Ազգային ժողովի քննարկմանը ներկայացնելու համար: «Ակնկալո՞ւմ եք, որ ձեր առաջարկները տեղ կգտնեն փաթեթում», - «Ազատության» այս հարցին ի պատասխան, Զադոյանը նշեց՝ «Կարծում եմ, որ ապրիլյան քառօրյա պատերազմը ցույց տվեց Հայաստանում կոռուպցիայի վտանգավոր հետևանքները, ու նաև իշխանությունները զգացին դրա լրջությունը: Դա ժամանակի հրամայականն է [կոուպցիայի դեմ պայքարը], հասարակության պահանջն է, կապրենք, կտեսնենք»:

Զադոյանն ընդգծեց՝ ապօրինի հարստացումը քրեականացնելը կոռուպցիայի դեմ պայքարի շղթայի կարևոր օղակներից մեկն է: Նաև հավելեց՝ անհրաժեշտ է, որ արդյունավետ գործեն կոռուպցիոն հանցագործությունների կանխարգելման ու բացահայտման մյուս օղակները ևս: «Մարդիկ ինչպե՞ս են ապօրինի հարստանում՝ կոռուպցիոն հանցագործությունների միջոցով. կաշառք են վերցնում, պաշտոնական դիրք են չարաշահում․․․ եթե իրավապահ մարմիններն արդյունավետ գործեն, բնականաբար, էդ հանցակազմի ներմուծման անհրաժեշտությունը չէր լինի»,- շարունակեց «Իրավաբանների հայկական ասոցիացիա» ՀԿ-ի նախագահը:

Եթե առաջարկների փաթեթն օրենքի վերածվի, այն հետադարձ ուժ չի ունենալու: Հարց է ծագում՝ ուրեմն ինչպե՞ս վարվել ապօրինի հարստացման նախկինում եղած դեպքերի հետ: «Օրենքը հետադարձ ուժ չի կարող ունենալ, հետապնդումներ չեն կարող լինել, դա արվում է այն բանի համար, որ այդ պահից սկսած արդեն այդ բաժանարար գիծը գծվի ու ամեն ինչ արդեն կատարվի օրինական դաշտում»,- հարցին ի պատասխան, նշեց Զադոյանը:

Կոռուպցիայի դեմ պայքարի խորհրդի երեկվա նիստին զեկուցումով է հանդես եկել նաև Բարձրաստիճան պաշտոնատար անձանց էթիկայի հանձնաժողովի նախագահ Սիրանուշ Սահակյանը: Նա ներկայացրել է բարձրաստիճան պաշտոնատար անձանց գույքի և եկամուտների հայտարարագրման ինստիտուտում առկա բացթողումները: «Ազատության» հետ զրույցում նույն հանձնաժողովի անդամ Արմեն Խուդավերդյանը թվարկեց այդ բացթողումներից մի քանիսը: Մասնավորապես, ըստ նրա, պետք է վերանայվի հայտարարագիր ներկայացնողների և փոխկապակցված անձանց շրջանակը, ինչպես նաև հայտարարագրի բովանդակությունը:

«Այսինքն, էսօր հայտարարագիր է ներկայացնում ամուսինը, համատեղ ապրող ծնողը, համատեղ ապրող զավակը, չափահաս չամուսնացած զավակը: Առաջարկվելու է այլ մոդել, որովհետև սա կիսատ պռատ է: Հայեցողությունը մեծ է՝ ի՞նչ է նշանակում համատեղ ապրող, ինչպե՞ս որոշենք համատեղ ապրելը․․․ ի՞նչ է նշանակում չափահաս, չամուսնացած: Արդյո՞ք չամուսնացած լինելը հանգամանք է, որ ինքը հայտարարագիր ներկայացնի: Իսկ ամուսնացա՞ծը: Պետք է ճիշտ շրջանակ ընտրվի, որը պետք է շրջափակի ցիկլը՝ ապօրինի հարստացումը բացահայտելու համար»,- ասաց Խուդավերդյանը:

Հայտարարագրման հետ կապված հաջորդ խնդիրը պարտավորությունների և, ըստ հանձնաժողովի անդամի, ավելորդ սահմանափակող շեմերի հետ է կապված: Օրինակ՝ փոխկապակցված մարդիկ հայտարարագրում են անշարժ գույքը 50 միլիոն դրամը գերազանցելու դեպքում, ինչը շատ բարձր է, ու անհրաժեշտ է վերանայել այդ շեմը: Հայտարարագրերի համակարգում ռիսկերը կամ անհամապատասխանությունները հասկանալու համար, ըստ Խուդավերդյանի, անհրաժեշտ է ունենալ անձի եկամուտների և ծախսերի մասին լիարժեք տվյալներ:

Այս բոլոր բացթողումները վերացնելու համար վարչապետը երեկ առաջարկել է Բարձրաստիճան պաշտոնատար անձանց էթիկայի հանձնաժողովին՝ երկամսյա ժամկետում կառավարության աշխատակազմի քննարկմանը ներկայացնել հայտարարագրման նոր մեխանիզմներ:

Մոտ 10 օր առաջ կառավարության աշխատակազմի ղեկավար-նախարար Դավիթ Հարությունյանն էլ Ազգային ժողովում հարցուպատասխանի ժամանակ նշել էր, որ հայտարարագրման ինստիտուտը պետք է փոխվի, այն պետք է համալրվի նոր գործիքակազմով, ինչը «հանցագործությունները բացահայտելու հնարավորություն կտա»: Ամենայն հավանականությամբ արդեն աշնանային նստաշրջանին խորհրդարանին կներկայացվի կառավարության մշակած օրինագիծը:

Ուղիղ հեռարձակում

XS
SM
MD
LG