Անցած շաբաթավերջին բացվեց Հայաստանի ազգային պատկերասրահի Որմնանկարների դահլիճում հանդիսավորությամբ բացվեց «Ազգային պատկերասրահ» 12-րդ միջազգային երաժշտական փառատոնը: Այս տարի այն նվիրված է մեր լավագույն տենորներից Գեղամ Գրիգորյանի հիշատակին:
Փառատոնը բաղկացած է հինգ համերգներից: Դրանցից առաջինի ընթացքում մեր լավագույն երգիչ-երգչուհիների կատարմամբ հնչեցին Բախի, Հենդելի, Մոցարտի, Պերգոլեզիի և այլ համաշխարհային մեծերի ստեղծագործությունները:
Փառատոնը կավարտվի հուլիսի 7-ին:
Մինչ այդ՝ հունիսի 28-ին Արամ Խաչատրյան համերգասրահում տեղի կունենա Հայաստանի ազգային ֆիլհարմոնիկ նվագախմբի հոբելյանական՝ հիմնադրման 90-ամյակին նվիրված համերգը: Դրան իրենց մասնակցությունը կբերեն մեր աշխարհահռչակ երաժիշտները՝ Հասմիկ Պապյանը, Սերգեյ Խաչատրյանը, Բասեղ Թումանյանը, Վահագն Պապյանը, Ալեքսանդր Չաուշյանը։ Համերգը կղեկավարի վերջին 16 տարին նվագախմբի գեղարվեստական ղեկավար և գլխավոր դիրիժոր Էդվարդ Թոփչյանը:
Մեկնարկել է ուշագրավ երիտասարդական գիտաժողով
Գիտությունների ազգային ակադեմիայում այսօր «Մշակութաjին աստղագիտությունը հայկական լեռնաշխարհում» խորագրի ներքո սկսվեց քառօրյա երիտասարդական գիտաժողովը, որը նպատակ ունի վերհանել մշակույթի և աստղագիտության դարերից եկող կապը Հայաստանում և առհասարակ ողջ աշխարհում:
Գիտաժողովին ԳԱԱ-ի և Հայաստանի մի շարք բուհերի երիտասարդ գիտնականների, դասախոսների կողմից կներկայացվեն մի քանի տասնյակ բանախոսություններ, որոնց վերնագրերն արդեն իսկ շատ հետաքրքրիր են․ «Տիեզերքը հայոց դիցաբանական պատկերացումներում», «Աստղագիտության դրսևորումները պոեզիայում», «Տիեզերք, առասպել և կինոարվեստ», «Գրիգոր Գուրզադյանը - աստղագետ, էսսեիտ և նկարիչ», «Տիեզերքի սիմֆոնիան» և բազմաթիվ այլ շատ ուշագրավ թեմաներով բանախոսություններ, որոնք վերհանում են աստղագիտության և մշակույթի ամենատարբեր ոլորտների սերտ փախկապակցվածությունը, որ գոնե Հայաստանում ի հայտ է եկել հազարամյակներ առաջ՝ ժայռապատկերների ստեղծման և քարե աստղադիտարանների ժամանակներից:
«Գիտաժողովի նպատակն է Հայաստանում զարգացնել միջճյուղային գիտությունները, և աստղագիտությունը, լինելով այս ոլորտում առաջատար, լավագույն օրինակը կարող է դառնալ միջճյուղային գիտությունների զարգացման», - «Ազատության» հետ զրույցում ասաց գիտաժողովի կազմկոմիտեի նախագահ Սոնա Ֆարմանյանը:
