Մատչելիության հղումներ

Խորհրդարանը վավերացրեց միավորված ՀՕՊ համակարգ ձևավորելու համաձայնագիրը


Ազգային ժողովը նաև երկրորդ ընթերցմամբ ընդունեց Ընտրական օրենսգրքում փոփոխությունները։

Ազգային ժողովն այսօր արտահերթ նիստով վավերացրեց Հայաստանի ու Ռուսաստանի պաշտպանության նախարարներ Սերգեյ Շոյգուի և Սեյրան Օհանյանի կողմից 2015 թվականի դեկտեմբերի 23-ին Մոսկվայում ստորագրված «Հայաստանի Հանրապետության և Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագիրը։

Համաձայնագրին կողմ քվեարկեց 101, դեմ՝ 8 պատգամավոր։ Քվեարկությունից առաջ ելույթ ունեցավ միայն պատգամավոր Տիգրան Ուրիխանյանը՝ հայտարարելով, որ հասարակության շրջանում կա մտահոգություն, և ինքը դեմ է քվեարկելու այս համաձայնագրին։

Խորհրդարանը նաև երկրորդ ընթերցմամբ ընդունեց ԸՕ փոփոխությունները

Ազգային ժողովն այսօր նաև երկրորդ ընթերցմամբ ու ամբողջությամբ ընդունեց Ընտրական օրենսգրքում փոփոխություններ և լրացումներ կատարելու վերաբերյալ օրինագիծը։

Նախագիծը, որով առաջարկվում է ընտրություն իրականացնել միայն նույնականացման քարտերով, ձեռք բերել տասը մատնահետքեր ստուգող սարք և բոլոր տեղամասերից ընտրական գործընթացը ուղիղ եթերով հեռարձակել, արժանացավ 104 պատգամավորի հավանությանը։

Հիշեցնենք, Ընտրական օրենսգրքի վերաբերյալ իշխանության, ընդդիմության և քաղաքացիական հասարակության միջև 4+4+4 ձևաչափով ընթացող բանակցությունների արդյունքում հունիսի 16-ին ստորագրվեց օրենսգրքում ընտրական գործընթացի օրինականության վերահսկման կազմակերպման տեխնիկական մեխանիզմների սահմանման շուրջ փախհամաձայնության մասին հայտարարությունը, ինչից հետո կառավարությունը հավանություն տվեց համապատասխան օրինագծին և այն ներկայացրեց խորհրդարանի արտահերթ նստաշրջանի քննարկմանը:

Չնայած Ընտրական օրենսգրքի փոփոխություններն այսօր ընդունվեցին, դրանք 2017 թվականի խորհրդարանական ընտրություններին կարող են և չկիրառվել, եթե մինչև սեպտեմբերի 1-ը կառավարությունը միջազգային դոնոր կազմակերպություններից չստանա դրանց իրականացման համար անհրաժեշտ 16 միլիոն դոլարը։

Խորհրդարանի արտահերթ նիստն այսօր քսան րոպե տևեց: «Բարի ճանապարհ՝ այսօրվա համար», - նիստի ավարտին հայտարարեց Ազգային ժողովի նախագահ Գալուստ Սահակյանը։

Ուղիղ հեռարձակում

XS
SM
MD
LG