Մատչելիության հղումներ

Գազայում մահմեդականները ապաստան են գտել եկեղեցում


Գազայի հատվածում Իսրայելի զինված ուժերի և «Համաս»-ի զինյալների միջև արդեն գրեթե մեկ ամիս շարունակվող հակամարտության հետևանքով տեղահանված մարդկանց մի մասը ապաստան է գտել Գազա քաղաքում գտնվող քրիստոնեական եկեղեցիներից մեկում:

Մարդասիրական օգնություն տրամադրող գործակալությունները ջանքեր են գործադրում` օգնելու համար Գազայի հատվածում Իսրայելի զինված ուժերի և «Համաս»-ի զինյալների միջև արդեն գրեթե մեկ ամիս շարունակվող հակամարտության հետևանքով տեղահանված մարդկանց: Նրանց մի մասը ապաստան է գտել Գազա քաղաքում գտնվող քրիստոնեական եկեղեցիներից մեկում:

Գազայում Հույն Ուղղափառ եկեղեցու առաջնորդարանը դարձել է իրենց բնակարաններից փախուստի դիմած ավելի քան 800 մահմեդականի ապաստանը:

Առաջնորդարանում այժմ բնակվող Գազայի որոշ բնակիչներ այնտեղ ապրում են հակամարտության առաջին իսկ օրերից: Այլոք նախ փորձել էին ապաստան գտնել ՄԱԿ-ի դպրոցներում, սակայն այնտեղ արդեն տեղ չկար:

«Եկանք այստեղ, և քահանան մեզ համար բացել է եկեղեցու դռները», - հիշում է Մոհամեդ Խալաֆը, որն իր ընտանիքի 30 անդամների հետ Հույն Ուղղափառ եկեղեցու Առաջնորդարանում է գտնվում արդեն երեք շաբաթ:

Առաջնորդարանում ապաստան գտած ընտանիքներից բացի եկեղեցին օգնություն է տրամադրում մոտակա փողոցներում բնակվող 1600 մարդու:

Մարդիկ այցելում են մոտակա մզկիթը միայն աղոթքի ժամերին` մտավախություն ունենալով, որ այն կարող է ռմբակոծության ենթարկվել:

Մոհամեդ Խալաֆին չի մտահոգում այն հանգամանքը, որ ինքը եկեղեցում է բնակվում:

«Քրիստոնեությունն ու մահմեդականությունը գրեթե նույն կրոնն են: Մենք մեկ ժողովուրդ ենք, մեր մեջ տարբերություն չկա», - համոզված է նա:

Նույն կարծիքին է, ըստ Գազայում օգնություն տրամադրող «Աներա» կազմակերպությունից Ռանիա ալ-Հելոի, տեղի բնակիչների մեծամասնությունը:

«Այս եղբայրությունը, մահմեդականների և քրիստոնյաների միջև կապերը ամուր են եղել Գազայի ողջ պատմության ընթացքում», - ասում է նա:

Այս միասնությունը շատ անհրաժեշտ կլինի գալիք ժամանակների համար, երբ Գազայի բնակիչները սկսեն վերացնել պատերազմի հետևանքները:

Ուղիղ հեռարձակում

XS
SM
MD
LG