Հայ ազգային կոնգրեսի փոխնախագահ Լևոն Զուրաբյանն «Ազատության» հետ զրույցում ասում է, որ աշխարհը կողջունի ցանկացած փաստաթուղթ, որը Հայաստանն ու Ադրբեջանը իրար հետ ստորագրում են։
«Իհարկե, երբ կա կոնֆլիկտ, աշխարհը տեսնում է որևէ համաձայնություն, կարևոր չէ՝ մեզ համար ձեռնտու է, ձեռնտու չէ, եթե որևէ համաձայնություն ստորագրվում է, ամբողջ աշխարհը ողջունում է դա», - նշեց նա։
«Ազատություն» - Վարչապետի, այդ թվում և այսօրվա մեկնաբանությունը Ձեզ բավարարեց, որ այնուամենայնիվ, կա սկզբունք, քաղաքական հիմք, դա Ալմա-Աթայի հռչակագիրն է, և ինչը կարող է ենթադրել, որ այդ նույն սկզբունքով այդ գործընթացը կտարածվի նաև սահմանի ամբողջ երկայնքով, ոչ միայն Կիրանցում։
Լևոն Զուրաբյան - Չէ, սա անհեթեթություն է, որովհետև իրականում նույն այդ պայմանավորվածության մեջ շատ հստակ ասված է, որ այդ սկզբունքը կարող է նաև փոփոխվել, և դա արդեն շատ լուրջ խնդիրներ է առաջացնում. նախ՝ ինչո՞ւ ենք մենք հատվածային սահմանազատում անում, մեր հենց այն հատվածում, որ ռազմական առումով այսօր ամենակարևորն է Ադրբեջանի համար, որ եթե պատերազմական գործողություններ լինեն, ինքը կկարողանա ավելի հեշտ դիրքերից դա անել։ Եվ երկրորդը՝ ինչո՞ւ ենք այդ վերապահումն անում, այսինքն՝ ստացվում է՝ այն դեպքում, երբ Ալմա-Աթայի, այսպես ասած, հռչակագիրը ձեռնտու է Ադրբեջանին, «մենք շարժում ենք էդ ձևով», իսկ մնացած դեպքերի համար մենք հստակ վերապահում ենք դնում, որ կարող է և փոփոխվի։
«Ազատություն» - Որովհետև այս գյուղերի դեպքում խոսքը բնակավայրերի մասին է, ինչպես Ադրբեջանն է ներկայացրել դա միջազգային հանրությանը, և փաստորեն ընկալում ունեցել է Բաքուն միջազգային հարթակներում, որ հայերին հարցրել են՝ «ինչո՞ւ եք օկուպացրել այդ չորս գյուղերը»։
Լևոն Զուրաբյան - Շատ լավ։ Եթե Դուք այդ հարցադրումը դնում եք, ես էլ մի ուրիշ հարցադրում եմ դնում, իսկ կարելի՞ է Նիկոլ Փաշինյանին վստահել ընդհանրապես, այսինքն՝ այն ձևով, ոնց որ ինքը մատուցում է և՛ բանակցության ընթացքը, և՛ Ադրբեջանի պահանջները կարելի է նրան վստահել ընդամենը փետրվարին նա հարցազրույց տվեց։
Հարցազրույցն ամբողջությամբ՝ տեսանյութում.
